Penulis : SKPD Kota Sukabumi
28 - 08 - 2015
Walikota Sukabumi, H. Mohamad Muraz, S.H., M.M., boh sacara pribadi boh Kepala Daérah katut Pamaréntah Kota Sukabumi, ngahaturkeun nuhun ka sakumna pihak, anu geus ngabantu jeung ngarojong kana palaksanaan pangwangunan deui Pasar Pelita Kota Sukabumi, sarta pangwangunan tempat panampungan saheulaanan padagang Pasar Pelita Kota Sukabumi, di lahan urut Depot Pertamina Kota Sukabumi, cindekna di lelewek Kalurahan Citamiang, Kacamatan Citamiang, Kota Sukabumi.
Walikota Sukabumi ngajelaskeun, sakumaha anu dimalum ku saréréa, yén Kota Sukabumi téh ngabogaan Visi Pangwangunan Kota Sukabumi Taun 2005-2025, nya éta Ngawujudna Kota Sukabumi Sabagé Puseur Palayanan anu Hadé dina Widang Pendidikan, Kaséhatan jeung Perdagangan di Jawa Barat, anu di Dadasaran Ku Iman jeung Taqwa; sarta Visi Walikota katut Wakil Walikota Sukabumi Taun 2013-2018, nya éta Ku Iman jeung Taqwa Ngawujudkeun Pamaréntahan anu Rahmatan Lil Alamin.
Tah pikeun ngawujudkeun kadua eta visi téh, dilaksanakeun rupa-rupa program jeung kagiatan pangwangunan, ka asup ngawangun deui Pasar Pelita Kota Sukabumi, sabagé puseur perdagangan atawa pasar anu réprésentatif. Lantaran pasar téh jadi tujuan utama pikeun warga masarakat, sabagé tempat pikeun nyumponan kabutuhan hirup sapopoé. Sabab rupa-rupa kabutuhan poko warga masarakat, pasti aya di pasar, boh bahan pangan boh sandang, anu dijual sacara grosir jeung ritél atawa écéran.
Salian ti éta ogé dijelaskeun, luyu jeung kamekaran warga masarakat anu gancang muru ka arah modéren, ngaakibatkeun beuki réa tumuwuh Pasar Sewalayan, boh mangrupa Minimarkét jeung Supermarkét, boh Hypermarkét jeung Pasar Modéren séjénna. Ngan sok sanajan kitu, pikeun para padagang di Pasar Tradisional, ku réana tumuwuh Pasar Modéren téh, henteu ngajadikeun faktor utama kana turunna pangsa pasar. Sabab Pasar Tradisional ogé masih kénéh mampu sakaligus jadi saéngan pikeun Pasar Modéren, boh dina masalah kualitas boh dina masalah harga.
Sedengkeun anu jadi hahalang pikeun para padagang Pasar Tradisional téh, nya éta aya dina ruang lingkup anu heureut, sarta kotor jeung becék. Tah ku ayana éta hal téh, ogé luyu jeung Visi Pangwangunan Kota Sukabumi sarta Visi Walikota katut Wakil Walikota Sukabumi, ka asup niténan kaayaan Pasar Pelita Kota Sukabumi, hususna tina masalah kaséhatan jeung sekala palayanan pasar sabagé pasar pang badagna di Kota Sukabumi, kurang nyumponan sarat jeung kahayang balaréa, boh pamaréntah boh masarakat.
Tah ku kituna, éta pasar téh perlu sagancangna diwangun deui anu leuwih representatif, supaya bisa ngaakomodir rupa-rupa kabutuhan masarakat. Disagigireun ti éta, para PKL (Padagang Kaki Lima) anu aya di sabudeureun éta pasar, bisa ditampung di lanté dasar pasar anu anyar. Lian ti éta ogé dijelaskeun, hal anu teu éléh penting dina ngawangun deui éta pasar téh, nya éta aya aréa pedestrian atawa torotoar jeung aréa parkir anu nyumponan kabutuhan, supaya warga masarakat anu rék balanja, bisa leuwih gampang ngadeugdeug éta pasar.
0 komentar:
Post a Comment